Lokali i natës ku ndodhi përplasja me armë në Vlorë është shkatërruar plotësisht për shkak të breshërive të armëve mes personave që u përfshinë në sherr. Viktima mësohet se është një 33 vjeçar, sipas policisë, i identifikuar si Ergys Gjioveshaj. Tre të plagosurit janë dërguar me urgjencë në spitalin e Vlorës, për shkak të plagëve nga plumbat. Tre persona janë shoqëruar në polici dhe po merren në pyetje për shkaqet e sherrit raporton gazetari i News24, Enrik Mehmeti. Dyshohet se shkak i sherrit është bërë muzika në lokal.
Njoftimi i plotë i policisë:
Rreth orës 23:20, në lagjen “Ujë i Ftohtë”, në ambientet e një lokali pas një konflikti të çastit, një person ende i paidentifikuar nga ana jonë ka qëlluar me armë zjarri në drejtim të palës tjetër.
Për pasojë ka mbetur i vdekur shtetasi Ergys Gjioveshaj, 33 vjeç banues ne Vlorë.
Si dhe janë plagosur 3 shtetas të tjerë të cilët janë dërguar në Spitalin Rajonal Vlorë për ndihmë mjekësore:
1. F.H., 28 vjeç.
2. A.L., 26 vjeçe.
3. A.Ll., 32 vjeç.
Të tre të plagosurit ndodhen jashtë rrezikut për jetën.
Policia ndodhet në vendngjarje duke kryer hetimet në lidhje me sqarimin e rrethanave.
Deri në këto momente janë shoqëruar 3 persona me të cilët po punohet për zbardhjen e ngjarjes.
Jane ngritur pika kontrolli, si dhe forca të shumta policore po krehin zonën përreth vendngjarjes për kapjen e autorit.
